--------------------------------------------------------------------------------
الحزين اللي ينام وفي عيونه دمعتين
كنه فوق الجمر نايم لا تقلب يشتعر
ألف آه وسط جوفه ما رضا يوم تبين
كاتم العبرة ولكن دمع عينه ينحدر
ما على لسانه سوى كلمة ربي يعين
وخز سيف في صميمه كل ما قيل الصبر
ما أنفطر قلبه على حزنه ولا ضيم السنين
مير الظلم اغلى الحبايب شاعل قلبه جمر
بس يا همومه كفايه وش بعد اكثر تبين؟
من كبر همه وحزنه صار هاوي للشعر
شوفي كيف ابدع بوصفك من كثر ما هو حزين
كل من قرأ سطوره خاطره منها انكسر
عيت الفرحه تزوره وعيا حظه لا يزين
في خطايا الروح يبكي ويبتسم بين البشر
وقته القاسي كسر به ما رضا لحظه يلين
ما شكى كثرة همومه غير للي مقتدر
واحد يعلم بحاله خالقه هو المعين
يطلب الله في صلاته يرأف بحاله القدر
ويالله تفرج همومي وهم كل قلب حزين
وترزق المهموم بسمه عقب ضيقات الصدر
